ភ្នំពេញ៖ អនាគតនាយករដ្ឋមន្រ្ដីកម្ពុជាអាណត្តិទី៧ លោក ហ៊ុន ម៉ាណែត បានលើកឡើងទស្សនៈមួយក្នុងការដឹកនាំថា «ត្រឹមមានគំនិតនិងឆន្ទៈមិនគ្រប់គ្រាន់ទេ បើយើងមិនធ្វើ ឬមិនហ៊ានធ្វើ»។

លោក ហ៊ុន ម៉ាណែត លើកឡើងដូចនេះលើបណ្តាញសង្គមផ្លូវការលោកនៅថ្ងៃទី ខែសីហា ឆ្នាំ២០២៣ ដោយបញ្ជាក់ថា៖ «ធ្វើកិច្ចការអ្វីមួយ យើងត្រូវផ្តល់តម្លៃទៅលើលទ្ធផលជាក់ស្តែង លទ្ធផលទោះជាតូច ឬតិចយ៉ាងណា ដែលកើតចេញពីការធ្វើសកម្មភាពជាក់ស្ដែង គឺនៅតែប្រសើរជាងការត្រឹមតែបញ្ចេញនូវមតិឬគំនិតធំៗ ឬត្រឹមតែការសម្ដែងនូវឆន្ទៈមោះមុតក្នុងការធ្វើ ប៉ុន្តែមិនធ្វើ ឬមិនហ៊ានធ្វើអ្វីសោះ»។

គួរឱ្យដឹងដែរថា លោក ហ៊ុន ម៉ាណែត ទទួលបានការអប់រំទូទៅនៅភ្នំពេញ ហើយក្រោយមកបានចូលបម្រើកងទ័ពនៅឆ្នាំ១៩៩៥ ក្នុងឆ្នាំដដែលនោះ គាត់បានចូលរៀននៅ សាលាយោធាសហរដ្ឋអាមេរិកនៅវ៉េសផនត៍ (West Point) ដោយបានទទួលសញ្ញាប័ត្រនៅឆ្នាំ១៩៩៩ ហើយលោកបានក្លាយជាជនជាតិខ្មែរដំបូងគេដែលបានបញ្ចប់ការសិក្សាពីបណ្ឌិត្យសភាយោធាដ៏ល្បីល្បាញមួយនេះ។ លោក ហ៊ុន ម៉ាណែត បានដឹកនាំទ័ពជើងគោកកម្ពុជាចាប់ពីខែកញ្ញា ឆ្នាំ២០១៨៕